O Concello de Teo convoca un concurso de curtas xuvenil baixo o lema Historias que nos moven, para promover a cultura creativa e a participación social entre a súa mocidade, fomentando a expresión artística e o desenvolvemento das habilidades audiovisuais.
Desta forma, o goberno local quere coñecer de primeira man e dun xeito orixinal e inédito as inquedanzas da súa xuventude, fomentar a empatía entre eles e os comportamentos
positivos cara as temáticas obxecto do certame. Ademais, só poderán participar mozos e mozas de entre 12 e 18 anos, ambos incluídos, que estean empadroados no Concello de
Teo.
O prazo para a presentación de traballos comeza este sábado 21 de decembro, coincidindo co Día Mundial da Curtametraxe, e rematará o vindeiro 21 de febreiro. Os participantes
poderán presentar curtas que traten temas de interese social, emocional ou da vida cotiá como a amizade, o ambiente, a igualdade, os soños, a prevención do acoso escolar, etc.
As curtas realizaranse con dispositivos móbiles e as gravacións faranse preferentemente en Teo.
A duración non poderá superar os catro minutos, incluídos o título e créditos. Os traballos poderán ser individuais ou grupais e poderanse presentar máis dun traballo por
persoa ou grupo participante.
O xurado estará formado por profesionais do mundo audiovisual, da educación, de mocidade e persoal do departamento de Cultura. Valorarase a mensaxe da curta e o seu
impacto, ademais da súa orixinalidade e creatividade.
Este concurso estará dotado cun primeiro premio de 200 euros e un certificado, o segundo premio con 125 euros e certificado e o terceiro premio con 75 euros e certificado.
A gala de entrega de premios levarase a cabo de xeito presencial presentando as curtas e proxectaranse as gañadoras, tanto no evento como nas redes sociais do Concello e na
páxina web. Así, quedará patente o enorme talento artístico da mocidade de Teo.
As bases deste certame están colgadas na páxina web do Concello para que poidan ser consultadas por toda persoa interesada.
