A escritora viguesa Noa Pérez González foi a gañadora da undécima edición do Certame Poético Rosalía de Castro convocado polo Concello de Padrón pola súa obra Pequeno panteón politeísta.
O xurado, composto por Anxo Arca, Manuel Lorenzo Baleirón, Anxo Angueira, Miriam Ferradáns Derradás, Inés Mosquera Calvo e Rita Bugallo González, destacou da obra gañadora «a forza de certas imaxes, o humor, a ironía coa que reflexiona sobre lembranzas da súa infancia e a frescura coa que aborda a súa xeografía sentimental».
Noa Pérez recibirá un premio de 1.500 euros e ademais a súa bora será publicada na colección Poesía Rosalía de Castro que edita o Concello padronés.
A autora premiada é licenciada en Filoloxía Galega, Filoloxía Románica e Filoloxía Hispánica pola Universidade de Santiago de Compostela, e exerce de profesora de Lingua galega e Literatura no ensino secundario. Ten publicadas dúas novelas: O ocaso da familia portela e A pedra de ámbar gris.
