O vindeiro luns 5 de xaneiro será unha xornada de ilusión e festa en Rois coa agardada visita dos Reis Magos, que percorrerán todas as parroquias do municipio para saudar aos máis pequenos. Este ano, coincidindo co paso da comitiva, asociacións veciñais e comisións de festas organizaron merendas e actividades para entreter a espera e facer desta data unha xornada de convivencia polo Nadal.
Os tres Reis Magos comezarán o seu percorrido en Rois ás 10.45 horas e rematarano en Oín coa tradicional ofrenda ao Neno Xesús. Durante o seu transcurso polas distintas parroquias pasarán por Buxán (11.30), Leroño (12.00), Augasantas (12.20), Ermedelo (15.00), Urdilde (15.45), Costa (16.30), Herbogo (17.15), Seira (17.45), Sorribas (18.15) e Ribasar (18.45). A comitiva será recibida na meirande parte das paradas con merendas e obradoiros.
Percorrido dos Reis Magos en Rois / Cedida
Unha vez rematado o itinerario, os Reis Magos dirixiranse ao pavillón de Rois, onde serán recibidos pola corporación municipal e repartirán agasallos entre os cativos. A festa comezará ás 18.30 horas e contará con música, xogos e obradoiros. Ademais, unha gran chocolatada servirá para poñerlle a guinda á xornada.
