Caión reforza os seus atractivos con dous murais que xa embelecen os espazos públicos da vila, grazas ao proxecto O mar de Caión: Un acercamento ao medio ambiente mariño e costeiro impulsado polo Concello da Laracha e o Grupo de Acción Local do Sector Pesqueiro (GALP) da Costa da Morte. Dúas obras de arte urbano que poden contemplarse sobre a medianeira dun edificio da Avenida da Laracha e sobre a grúa do porto, que levan o selo dos artistas Yoseba MP e Pelucas Pilas Bubbles, respectivamente.
Dúas veciñas de Caión son as protagonistas do mural creado por Yoseba MP, inspirado nunha imaxe cedida polo fotógrafo Marcos Rodríguez. Josefa aparece en primeiro plano suxeitando un pinto de gran tamaño e Maruja, en segundo plano, transportando coa testa un cesto de peixe.
O artista explicou que “nun principio ía debuxar unicamente a foto coa imaxe impoñente de Josefa”, pero segundo ía realizando a obra decatouse de que na parte esquerda encaixaba á perfección a figura de Maruja achegada nunha fotografía de Antón, un veciño da vila caionesa. Di estar “moi contento co cambio do deseño que fixen sobre a marcha” para que aparecesen as dúas mulleres. Yoseba MP, co financiamento do Concello, tamén firmou recentemente outro mural nun edificio da Avenida Fisterra da capital municipal que vai ser presentado en próximas datas.
Inauguración do mural de Pelucas Pilas Bubbles no porto de Caión / C. Laracha
Pola súa banda, o mural de Pelucas Pilas Bubbles sobre a grúa do porto presenta un concepto radicalmente diferente, combinando “a cor con abstracción e imaxes reais con fotografías antigas do pobo” nun “colaxe que abarca temas artísticos, pictóricos, o pop, o mar, os mariñeiros, o surrealismo… un cúmulo de historias que se poden relacionar pero abertamente, para que cada persoa poida facer a súa interpretación», explica o artista, quen considera que “o arte é imitar a natureza e realzar o natural, e Caión naturalmente é unha marabilla”.
O proxecto O mar de Caión: Un acercamento ao medio ambiente mariño e costeiro prevé a elaboración doutros dous murais en 2025, a instalación no paseo marítimo tanto da ruta Self-Caionízate, con estruturas que permitirán realizarse autorretratos, como de letras corpóreas de Caión para resaltar a identidade desa localidade, e as actividades de educación ambiental e exposicións xa realizadas a finais de verán.
A inauguración oficial dos dous murais estivo presidida polo alcalde da Laracha, José Manuel López Varela, e no acto participaron, ademais dos dous artistas, o presidente e o xerente do GALP Costa da Morte, Evaristo Lareo e Guillermo González; e o fotógrafo Marcos Rodríguez, entre outros.
