Los opositores asturianos van recibir apoyu económicu del Principáu pa favorecer la igualdá d’oportunidaes nel accesu al emplegu públicu autonómicu. L’ayuda, que pue algamar los 8.400 euros por aspirante, ta pensada pa sufragar una parte de los gastos venceyaos a la preparación de los procesos selectivos.
Van poder financiase los honorarios d’academies, centros especializaos o preparadores, amás de la compra de temarios, códigos y llibros rellacionaos direutamente col procesu selectivu. Tamién van poder cubrise gastos d’alquiler d’una vivienda o habitación cuando faigan falta pa preparar les oposiciones y se cumplan les condiciones establecíes nes bases.
L’oxetivu, indiquen dende l’Alministración, ye que «la situación económica d’una persona o de la so familia nun llende les sos posibilidaes de preparar unes oposiciones«. Pa ello va destinase una inversión total de 100.000 euros.
«Preparar una oposición esixe tiempu, esfuerzu y tamién recursos. Con estes ayudes queremos amenorgar les barreres que puen atopar delles persones pola so situación económica nel accesu a un emplegu públicu. Que seyan el méritu, la capacidá y la preparación de cada aspirante los que determinen les sos oportunidaes», esplicó la vicepresidenta del Principáu, Gimena Llamedo.
Les ayudes d’esti añu tán dirixíes a persones que preparen procesos d’ingresu en cuerpos del grupu A, tanto xenerales como especiales, incluyíos nes ufiertes d’emplegu públicu del Principáu correspondientes a 2022, 2023, 2024 y 2025. El periodu subvencionable va dende’l 2 d’ochobre de 2025 hasta’l 1 d’ochobre de 2026, dambos díes incluyíos.
Esta llinia d’ayudes entamóse en 2024 y dende entós benefició a 72 persones. Les solicitúes van poder presentase namás per vía electrónica, hasta’l 3 d’ochobre, al traviés de miprincipado.asturias.es.
«Cola ayuda del Gobiernu del Principáu d’Asturies»
