A directora xeral de Traballo Autónomo e Economía Social, Marta Mariño, participou na xornada Emprender, conectar e co-crear no turismo da Costa da Morte, organizada en Vimianzo polo Polo de emprendemento e apoio ao emprego de Coristanco.
O encontro serviu para achegar modelos de negocio innovadores na Costa da Morte, como resposta ás necesidades de emprendemento, explorando as oportunidades que oferta o territorio e intercambiando experiencias, ao tempo que se ofrece a posibilidade de formar sinerxías con emprendedores xa reafirmados e así fortalecer as estratexias de negocio.
A través desta iniciativa búscase tamén consolidar e reforzar a Rede de polos de emprendemento e apoio ao emprego (unha iniciativa pública nada en xullo de 2022) que presta, de forma gratuíta e a través das súas 15 oficinas, asesoramento individualizado, tanto a quen desexa emprender na Comunidade como a quen xa o fixo e quere consolidarse.
A Rede ten, ademais, un gran foco no rural, co obxectivo de dinamizar a economía local, fixar poboación e afrontar o reto demográfico. Neste marco, o Polo de Coristanco, desde a súa creación no ano 2022, leva preto de 310 proxectos atendidos e máis de 150 actividades realizadas. O número de emprendedoras é do 51 % do total.
