O espazo iSlow Coliving de Laxe acaba de poñer en marcha a segunda edición do programa Fixar, unha iniciativa que convida a mozos emprendedores galegos a explorar novas formas de vida e traballo no rural a través de experiencias de colaboración.
O primeiro grupo (cinco participantes) xa se instalou no centro. Alí vivirán e traballarán durante dúas semanas compartindo experiencias con outros colivers de Italia e Alemaña.
A través deste programa, cada participante terá a oportunidade de profundar no seu proxecto persoal e profesional, contando co apoio doutras persoas emprendedoras, creativas e comprometidas co territorio.
O encontro comezou cunha cea de benvida e unha sesión de presentación na que cada un compartiu os seus intereses e motivacións persoais.
O grupo visitou a vila e reuniuse para comezar a explorar conxuntamente os obxectivos, recursos e desafíos de cada proxecto, co obxectivo de avanzar de forma colaborativa.
Como parte da súa estadía, o grupo participará mañá luns nun evento de co-creación no emprendemento organizado polo Polo de Emprendemento da Costa da Morte-Fonteboa (Coristanco) en colaboración coa Asociación de Profesionais do Turismo da Costa da Morte, onde compartirán experiencias e ideas con outras persoas emprendedoras da comarca.
Fixar é unha aposta pola innovación social, a conexión interterritorial e o impulso de iniciativas con impacto local.
Ao longo das próximas semanas, os participantes realizarán actividades de aprendizaxe, encontros coa comunidade e momentos de creación compartida, sempre desde o respecto pola contorna e a cultura galega.
Un lugar no que poder fixar raíces, ideas e futuro
O programa continuará durante os próximos meses con novas quendas e participantes, profundando na idea de que o rural pode ser un lugar onde fixar raíces, ideas e futuro.
O programa Fixar é unha iniciativa financiada pola Consellería de Emprego, Comercio e Emigración no marco do seu apoio ao emprendemento e á fixación de poboación no rural.
Esta edición celébrase en colaboración con iSlow Coliving, Sende e Anceu Coliving, dando continuidade á rede de colivings galegos que xa participaron na iniciativa na pasada edición.
O programa continúa aberto para recibir novas inscricións, e os seguintes grupos iranse configurando ao longo dos próximos meses. As persoas interesadas poden obter máis información e solicitar a súa participación a través das plataformas dos espazos colaboradores e na páxina web www.fixar.gal.
