A edición deste ano 2024 da campaña Toponimízate. Falámosche dos nomes da túa terra poñerá o seu punto e final este venres 8 de novembro en Boiro. A campaña de divulgación da toponimia da Real Academia Galega ofrecerá a última charla deste ano no Centro Social da localidade dende as 20.00 horas. O filólogo da RAG e coordinador técnico de Galicia Nomeada, Vicente Feijoo, explicaralles aos veciños como empregar esta aplicación que lles permite participar na recollida de nomes de leiras, montes, regos e outros microtopónimos nunha sesión que contará coa presenza do alcalde de Boiro, José Ramón Romero, e a concelleira de Educación e Normalización Lingüística, María Outeiral, que actuarán de presentadores.
Dende a presentación de Galicia Nomeada en decembro do 2019, o concello de Boiro recibiu 623 achegas públicas de máis de 55 persoas colaboradoras. Aínda así, o número total de topónimos que figuran na plataforma Galicia Nomeada, 767, é menor dos recollidos en concellos próximos da comarca do Barbanza como Rianxo (2.387) ou Ribeira (3.458), a pesar de que o municipio boirense ten unha maior extensión territorial. «Por tanto, queda moito traballo por facer, especialmente en parroquias como Bealo ou Macenda, que contan con menos topónimos rexistrados«, indica Vicente Feijoo, que durante a sesión explicará de xeito práctico as principais funcionalidades da plataforma.
Na charla desvelarase, ademais, a orixe e significado dos nomes das parroquias e aldeas do concello de Boiro, contando co apoio na investigación das etimoloxías do académico e profesor da Universidade de Vigo, Gonzalo Navaza. O público poderá ver ademais o episodio da serie O Seminario de Onomástica responde en que a académica Ana Boullón explica a orixe e significado do nome do concello.
A edición 2024 de Toponimízate rematará en Boiro un percorrido por unha ducia de concellos que comezou o pasado mes de xuño. Dende a posta en marcha desta iniciativa da RAG, desenvolvida co apoio da Secretaría Xeral da Lingua, máis de oitenta concellos acolleron encontros coa veciñanza centrados na divulgación da rica toponimia galega e na súa salvagarda a través da colaboración cidadá facendo uso da aplicación Galicia Nomeada.
