O deputado do BNG Óscar Insua demandou no Parlamento de Galicia que se realice «á maior brevidade posible» a avaliación de impacto ambiental do porto mixto de Corcubión. Pediu ademais que se inclúa nos orzamentos da Xunta de 2025 «unha partida con dotación suficiente para licitar e iniciar a execución das obras».
Lembra que o pobo de Corcubión leva «máis de 30 anos reclamando a construción de instalacións portuarias para a frota deportiva e pesqueira», coa fin de ordenar os marres na enseada da ría e darlles maior seguridade ás embarcacións.
Óscar Insua denunciou que cada inverno «van ás pedras dúas ou tres embarcacións» e esta obra, «ademais fomentaría o turismo náutico na única ría atlántica que por si mesma ten unha morfoloxía de porto de abrigo natural».
O deputado nacionalista salientou que o informe de impacto ambiental conclúe que «é necesario que o proxecto de Portos de Galicia se someta a avaliación ambiental ordinaria, polo que volven adiarse os prazos» e, por iso, ve necesario axilizar o proceso, «porque os efectos adversos significativos xa están identificados no informe publicado en marzo».
Non obstante, a iniciativa do BNG non saíu adiante xa que o PP votou en contra de incluir unha partida nos orzamentos.
