As medidas aplicadas en materia de eficiencia enerxética por parte da Universidade de Santiago no 2022 implicaron un aforro anual de 1.397 toneladas de dióxido de carbono entre o 2021 e o ano pasado. Trátase dunha cifra que equivale ao que emitirían á atmosfera medio millón de coches ao longo dun día percorrendo cada un deles 25 kilómetros, “xa que un coche de media por kilómetro emite 110 gramos”. Así fai a comparativa o vicerreitor de Transformación Dixital e Innovación, Gumersindo Feijoo Costa.
Trátase de datos facilitados a EL CORREO GALLEGO pola USC sobre unha pegada de carbono de alcance 2. “Nos datos temos en conta todos os tipos de enerxía que consumimos e como se producen, así como o consumo de auga e como se xera, neste caso por potabilización”, explica o vicerreitor.
Para entender o dato, Gumersindo Feijoo fala da necesidade de ter en conta tres variables: a eficiencia enerxética, o desempeño enerxético e as fontes renovables.
Un dos niveis de actuación coa enerxía é tratar de consumir menos e que ese menos sexa nas horas centrais do día. Feijoo sinala que «foi moi importante» o tema de fixar un horario de apertura para os centros e facultades de 8 a 21.00 horas e non ata as 22.30 horas. «Chegaban as dez da noite e tiñas as luces encendidas pero non había alumnado dentro polo que é un mal desempeño enerxético; entón, por moito que poñas sistemas leds non van a cumplir a función», detalla.
En referencia á eficiencia, onde entraría a aplicación de medidas como o aillamento de edificios ou a substitución de luces halógenas por LED, o obxectivo é «ter a mesma luminosidade gastando menos enerxía».
Na eficiencia tamén se busca ir aumentando o uso de fontes renovables, poñendo por exemplo placas solares. Esta sería a terceira variable que implicou ese forro anual de máis de mil toneladas de CO2 entre 2021 e 2023. En detalle, no ano 2020, marcado polo peche da covid, a pegada de carbono foi de 8.784 toneladas de dióxido de carbono. O ano seguinte chegouse ás 9.570, e no 2022, e coa instrución da xerencia das medidas de eficiencia enerxética, pasouse á cifra de 9.030 Tm, descendendo o ano pasado ás 8.173.
Gumersindo Feijoo: «Foi unha baixada moito máis alta do esperado»
O vicerreitor de Transformación Dixital define como «excelente» o aforro logrado na pegada de carbono. «Foi unha baixada moito más alta do esperado, que se consegue polo compromiso da comunidade universitaria de facer un uso moi racional», cita.
Ademais, é sostida no tempo, collendo velocidade a pendente do 2022 ao 2023. En concreto, decrece en algo máis dun 58% coas medidas de eficiencia enerxética.
Esta baixada supón un impacto na parte económica. «Un aforro no consumo dun 25% traduciríase na factura en preto de millón e medio de euros», di como unha aproximación.
De cara ao 2024, sobre o cal a USC non ten por agora datos, Feijoo prevé que a pegada de carbono se seguirá reducindo. «Estamos cerca do obxectivo que tiñamos de cara ao 2026 de baixar do umbral das 8.000 toneladas. Podemos chegar ás 7.500, sendo optimistas», asegura.
Liña de actuación para optimizar a eficiencia enerxética
No informe de xestión do reitor relativo ao ano 2023 sobre a liña de actuación estratéxica de ‘Optimizar a Eficiencia Enerxética’ sinálase que co ánimo de diversificar a xeración de enerxía e incrementar as fontes renovables, procedeuse a presentar diversos proxectos ante o Inega (Instituto Enerxético de Galicia) que van permitir a instalación en paneis solares cunha potencia de 98,6 kWp (potencia pico) na Facultade de Matemáticas; 91,37 kWp no Cebega (Centro de Biomedicina Experimental); 89,25 kWp na Facultade de Ciencias da Comunicación e 94,77 kWp na EPSE do Campus de Lugo, cun custo total aproximado de 370.000 €.
Gumersindo Feijoo sinala que no pasado mes de decembro entraron en funcionamento diferentes puntos de recarga para vehículos eléctricos. En concreto, instaláronse en Filoloxía e Matemáticas do Campus de Santiago e na Escola Técnica Superior de Enxeñaría do Campus de Lugo.
