La Conseyería d’Educación entamó’l sábadu pasáu la parte escrita de les prebes de certificación de llingua asturiana na Escuela Oficial d’Idiomes d’Uviéu. La principal novedá ye que s’incorporó l’exame de nivel básicu (A2), amás de los niveles entemediu (B2) y avanzáu (C1).
Nesta quinta edición de les prebes almitiéronse 121 persones, de les que 14 tán inscrites nel A2, 58 nel B2 y 49 nel C1, según informó’l Principáu en nota de prensa.
Los exámenes de certificación consten de cinco partes independientes. Trátase de comprensión de testos escritos, comprensión de testos orales, producción y coproducción de testos escritos, producción y coproducción de testos orales y mediación. Pa llograr el certificáu hai que tener polo menos una puntuación de 5 en caúna de les partes y un 6 de promediu ente toes elles.
Pa evaluar les prebes, la conseyería nomó trés tribunales integraos por profesores funcionarios de carrera del cuerpu de Secundaria y llingüistes especializaos n’asturianu.
La evaluación va tomar como referencia los oxetivos, conteníos y criterios establecíos nel Decretu 27/2019, de 21 de xunu, pol que s’establecen los niveles de competencia nel usu de la llingua asturiana y se regula la preba de certificación pa cada nivel en función del Marcu Común Européu de Referencia de les Llingües.
Educación encargóse de la convocatoria, ellaboración, inscripción, loxística, organización y aplicación de les prebes. Amás, va espedir los certificaos de superación al traviés del centru esaminador. Nel procesu d’inscripción collaboraron los IES Aramo, d’Uviéu; Calderón de la Barca, de Xixón; Carreño Miranda, d’Avilés, y Bernaldo de Quirós, de Mieres.
Sobre los exámenes orales, van ser nel IES Alfonso II, d’Uviéu, a partir del llunes 7 d’ochobre, en convocatories personalizaes y horariu de tarde.
«Cola ayuda del Gobiernu del Principáu d’Asturies»
, amás de los niveles entemediu (B2) y avanzáu (C1).Nesta quinta edición de les prebes almitiéronse 121 persones, de les que 14 tán inscrites nel A2, 58 nel){kind=link}