O Concello de Ribeira vén de anunciar a habilitación de novos areais para acudir con mascotas durante todo o ano, sumando xa así un total de cinco en todo o municipio. O alcalde, Luís Pérez, xunto coa concelleira de Medio Ambiente e Benestar Animal, Antía Alberte, fixeron a presentación desta medida na Insuela (Palmeira), unha das praias que, dende hoxe, admitirá a presenza de cans.
Deste xeito, habilitánse tres pequenas calas da Insuela –as que se atopan entre Punta Aguiúncho e a Pedra da Igrexa dos Mouros– nas que se poderá acudir con mascotas durante todo o ano, con horario ilimitado. Xunto elas, tamén se permitirá a presenza de cans con horario de 20.00 horas ás 11.00 do día seguinte, na praia da Gavoteira, que se suma así ao areal de Couso, na que está habilitado o acceso con mascotas dende o ano pasado.
Os membros da Corporación municipal amosaron a súa satisfacción coa entrada en vigor desta medida “agardada e demandada pola veciñanza”. Con todo, a concelleira de Benestar Animal lembrou a presenza de niños de píllara nas dunas, unha ave en perigo de extinción moi frecuente pola zona e que, advirte, “hai que ter coidado nos meses de aniñamento para evitar que os cans, por exemplo, coman un ovo”, manifestou.
O anuncio destes novos areais caninos prodúcense xusto despois da publicación neste diario das queixas de cans soltos polas praias que relataron residentes da parroquia ribeirense de Corrubedo. Protestas que só lle constan ao Concello por parte dunha veciña, segundo trasladou o mandatario Luís Pérez a este xornal.
