O alcalde da Estrada, Gonzalo Louzao, recibiu este mércores no seu despacho ao rexedor do Concello de Rianxo, Julián Bustelo, nun encontro no que os dous dirixentes acordaron programar conxuntamente iniciativas culturais para conmemorar o Ano Castelao a través do matrimonio que conformaron o rianxeiro Alfonso Daniel Rodríguez Castelao e a estradense Virxinia Pereira Renda.
«Somos dous concellos unidos por esta parella«, destacou Louzao, que trasladou a intención dos dous concellos de buscar iniciativas para celebrar unha figura tan emblemática como Castelao, pero nesta ocasión unindo as súas orixes rianxeiras co forte vínculo que tivo o autor coa Estrada, a raíz do seu casamento con Virxinia Pereira.
«Castelao ten un lazo moi importante coa Estrada. De igual xeito, tamén queremos destacar nos dous concellos a figura de Virxinia Pereira», engadiu o rexedor estradense.
Gonzalo Louzao, esquerda, e Julián Bustelo / Cedida
Tras coñecerse en Santiago nos seus tempos de estudante, Castelao e Pereira casaron no ano 1912 na igrexa de San Paio. Despois, tiveron un único fillo, Alfonso, que faleceu con 14 anos, e padeceron o exilio que os afastou da súa terra.
Ademais, como avanzaron, aproveitando o Ano Castelao, os dous concellos teñen a intención de afondar no coñecemento e divulgación sobre a figura da súa muller. «Queremos facer algo conxunto, non só para afondar na figura de Castelao, que é moi coñecida por todos, senón tamén para quen foi a súa Muller, Virxinia Pereira quen, dalgún xeito, é a eterna esquecida», sinalou.»É certo que na Estrada estamos centrados no Ano Cultural Avelina Valladarres, pero Castelao é ese gran referente cultural do idioma e do compromiso social de Galicia e nin A Estrada nin Rianxo poderían quedar alleos á celebración do Ano Castelao», destacou o rexedor estradense.
Ademais, Louzao recordou que son varios os elementos patrimoniais da Estrada que figuran na obra multidisciplinar de Castelao, desde pontes, cruceiros ou pazos ata a Estela de Ouzande.
