A Xunta e o Concello de Frades avanzan no proxecto definitivo para ampliar a estación de tratamento de auga potable (ETAP) de Ponte Carreira cun investimento superior aos 500.000 euros. A actuación levarase a cabo ao abeiro dun convenio de colaboración entre a Consellería de Medio Ambiente e Cambio Climático e o goberno local, no que o Executivo autonómico achegará o 80% dos fondos e o Concello o 20% restante.
O director de Augas de Galicia, Roi Fernández, e o alcalde de Frades, Roberto Rey, reuníronse esta semana para perfilar os últimos detalles do acordo, que esta próximo a ser asinado. No encontro tamén participaron o xerente de Augas de Galicia, Gonzalo Mosquera, e o concelleiro de Medio Rural, Manuel Ferreiro.
O rexedor fradense destacou que se trata dun proxecto «prioritario» para a localidade ao «permitir garantir o abastecemento de auga para os veciños«. Ademais, sinalou que é unha resposta ao incremento de persoas aboadas ao servizo e porque «as instalacións da actual ETAP están ao límite da súa capacidade».
Depuradora de Ponte Carreira / Cedida
Aumento dun 20% da capacidade
O obxectivo central deste proxecto é aumentar nun 20% a capacidade de tratamento e operatividade da ETAP, mediante a subtitución das bombas de captación en alta, a instalación dun novo sistema de decantación e a incorporación dun sistema de filtración máis eficiente. Esta mellora permitirá dar resposta ao crecemento da poboación usuaria e garantir a calidade do servizo.
Como destacan desde o goberno local, esta iniciativa cumpre un dos compromisos asumidos pola conselleira de Medio Ambiente e Cambio Climático, Ángeles Vázquez, nunha xuntanza previa con Roberto Rey.
Unha vez formalizado o convenio, procederase á licitación das obras, co fin de comezar os traballos canto antes.
Conservación do encoro da Presa
Paralelamente, a Xunta e o Concello avanzan no deseño do proxecto de acondicionamento e conservación do encoro da área recreativa da Presa, en Ledoira, situado en dominio público hidráulico do río Tambre. Esta actuación contará cun investimento de 50.000 euros integramente financiado pola Xunta, que asumirá tamén a reparación inicial da infraestrutura antes de cedela ao Concello, que se encargará do seu mantemento e conservación.
