Os concellos da Mancomunidade de Ordes reciben este ano case 368.000 € da Xunta para apoiar os seus Centros de Información á Muller (CIM) e para actividades de promoción da igualdade e o Plan Corresponsables. A entidade, que engloba os municipios de Cerceda, Frades, Mesía, Ordes, Oroso, Tordoia e Trazo, recibiu 120.000 € para financiar a contratación das 4 persoas que atenden o seu CIM, e máis de 15.400 do programa de promoción da igualdade e prevención da violencia de xénero.
Nesta comarca tamén foron beneficiados polas axudas desta convocatoria os concellos de Frades, Oroso, Trazo, Mesía, Cerceda e Tordoia con máis de 232.000 euros para actividades de conciliación e corresponsabilidade.
A delegada da Xunta na Coruña, Belén do Campo, visitou este xoves o CIM da Mancomunidade de Ordes para informar da resolución da convocatoria de axudas concedidas aos concellos, de máis de 12,2 millóns de euros, cun 12% máis de orzamento que en 2024.
Do Campo estivo acompañada da directora xeral de Promoción da Igualdade, María Quintiana;os alcaldes de Ordes, José Luis Martínez, e Oroso, Álex Doval;e a alcaldesa de Trazo, Josefina Suárez.
A delegada lembrou que a liña de apoio á rede de CIM da provincia conta con case 1,6 millóns de euros para financiar gastos de persoal de 73 traballadores, en 28 municipios da Coruña. «Con isto apóiase este servizo de atención integral, información e asesoramento ás mulleres e ás persoas LGBTI, no que traballan máis de 200 profesionais», explicou.
Este ano medra a contía máxima da axuda que poden recibir os concellos cando a solicitude é individual, pasando de 45.000 a 52.000 €. Para a xestión compartida o máximo son 120.000 €.
A liña de apoio para accións de promoción da igualdade e prevención da violencia de xénero recibiu na provincia máis de 100.000 euros para apoiar 8 concellos. Neste caso, as axudas máximas son de 28.000 euros para concellos mancomunados e de 15.000 euros paras as accións que desenvolva un só concello.
A Xunta adiantará aos concellos o 80% da contía dos apoios para que poidan desenvolver os programas coa liquidez necesaria.
Os apoios do Plan Corresponsables na provincia da Coruña beneficiarán este ano a 66 concellos, cun investimento de máis de 2,2 millóns para actividades de conciliación e sensibilización no eido da corresponsabilidade.
