O Concello de Laxe, a través do departamento de Servizos Sociais, fai un chamamento á veciñanza para que se alguén dispón dunha vivenda pechada, ou segunda residencia, as poñan a disposición para alugar temporalmente ás familias damnificadas polo incendio que queimou trece pisos o pasado sábado.
O alcalde, Francisco Charlín, apela «á solidariedade veciñal» para facer fronte «á difícil situación que está a vivir o noso municipio. Hai persoas afectadas que necesitan un fogar temporal e calquera axuda pode marcar a diferenza«.
As persoas que desexen colaborar con esta causa poden contactar co departamento de Servizos Sociais do Concello de Laxe para facilitar os seus datos e valorar as opcións. O teléfono de contacto é o 981 706 903.
Un dos tres edificios de Laxe que se viron afectados por un gran incendio / Cedida
«Entre todas e todos, podemos construír esperanza onde hoxe hai incerteza», afirma o rexedor laxense.
A situación vese agravada pola tempada de verán que está punto de comezar, xa que aínda que en Laxe hai moita vivenda baleira durante o ano, nestes meses a oferta é moi limitada, dado que a maioría dos pisos xa están reservados para os turistas que enchen cada ano a vila laxense durante os meses de xullo e agosto.
