Centos de voluntarios e voluntarias da provincia da Coruña participaron este sábado no IV Encontro Provincial de Protección Civil, celebrado en Baio (Zas). Un acto no que tamén se fixo entrega de medallas da Asociación Nacional de Asociacións de Voluntarios.
Á cita sumáronse a subdelegada do Goberno, María Rivas; o alcalde de Zas, Manuel Muíño; e o director xeral de Emerxencias, Santiago Villanueva.
Os voluntarios de Muxía, co alcalde e a tenente de alcalde, recibiron dúas condecoracións / Cedida
Rivas agradeceulles o seu «impulso a unha sociedade máis libre e segura», e puxo en valor o seu altruísmo, «unha implicación social fundamental que se aprecia en cada emerxencia, sexa de calado local, autonómica ou nacional». Neste senso, subliñou o especial labor que levaron a cabo estes voluntarios «nas xornadas da tráxica DANA en Valencia, ou nos incendios forestais en Galicia».
Muíño, cuarto esquerda, Rivas e Villanueva no acto celebrado en Baio / D. G.
Pola súa banda, Santiago Villanueva destacou a «xenerosidade e entrega» do persoal voluntario de Protección Civil a prol da prevención e a seguridade cidadá». O director xeral de Emerxencias recolleu, no nome do presidente da Xunta, a máxima distinción outorgada a Alfonso Rueda pola «constante e inestimable» colaboración coa Asociación Nacional de Protección Civil e coas agrupacións de voluntarios de Galicia.
Lembrou ademais que o luns publicouse a resolución de axudas por valor de 370.000 € para financiar os gastos de 61 agrupacións de Protección Civil da Coruña.
