O Consello da Xunta deu conta este luns do informe de dúas ordes de axudas por valor 6.967.662 euros polas que se regulan as bases e a convocatoria para o ano 2025, en réxime de concorrencia competitiva, ás persoas armadoras e, non competitiva, ás persoas tripulantes, pola paralización temporal da actividade na pesqueira do xurelo, na frota de cerco e determinados buques de artes menores dependentes da dita especie, durante 2024, así como pola paralización temporal da actividade na pesqueira do polbo durante este exercicio.
A norma, que recolle o procedemento administrativo para a solicitude destas achegas, publicarase ao longo do mes de maio no Diario Oficial de Galicia (DOG). O prazo para formalizar a petición será dun mes, a partir desta publicación. Están cofinanciadas nun 70% polo Fondo Europeo Marítimo, de Pesca e de Acuicultura (Fempa).
Polo que respecta á paralización do polbo, poderán beneficiarse das axudas un total de 345 embarcacións e 1.380 mariñeiros. O importe das axudas será de 2.762 euros por tripulante e no caso dos armadores a media será de 4.514 euros.
Unhas compensacións que se corresponden cos periodos de paro biolóxico do 1 ao 30 de abril.
No caso da veda do xurelo, poderán beneficiarse 65 navieiros e 658 mariñeiros. O importe das axudas por tripulante ascende a 2.200 euros e no caso dos armadores será, de media, de 22.687 euros.
As compensacións correspóndense con dous espazos temporais de 30 días consecutivos, para elixir entre os meses de xaneiro, febreiro e decembro do pasado ano 2024.
Como novidade con respecto a convocatorias anteriores, nestas dúas novas ordes os armadores que cumpran tamén coa condición de tripulante poderán resultar beneficiarios por esa dobre condición, e poderán cobrar a axuda conxuntamente como armador e tripulante.
Fomentar a pesca sustentable
O obxecto deste tipo de axudas é o de compensar a adopción de medidas de conservación e protección dos recursos mariños vivos e os seus ecosistemas, favorecendo as condicións de vida e traballo das persoas que se dedican a estas actividades mediante a explotación sustentable, equilibrada e responsable dos recursos, garantindo a viabilidade do sector pesqueiro.
As actuacións que se subvencionan favorecen os obxectivos de contribuír a un nivel de vida axeitado, fomentar a pesca sustentable e a recuperación e conservación dos recursos biolóxicos acuáticos.
