O Plan Único destina este ano 1.065.814,90 € ao Concello de Zas e será a «ferramenta de financiamento local máis relevante», segundo sinalou a deputada provincial Cristina García durante a súa visita ao municipio, onde se reuniu co alcalde, Manuel Muíño, e parte da Corporación municipal.
Ademais, visitou as obras de adecuación do bordo da estrada entre o núcleo urbano de Zas e o lugar de Ventoseco. «Obras como esta son o mellor exemplo de como o Plan Único contribúe á mellora da calidade de vida da veciñanza, que ese é, en esencia, o fin deste plan», afirmou ao respecto García Rey.
Pola súa parte, o alcalde, Manuel Muíño, sinalou que «é importantísimo para os concellos, pois posibilita facer investimentos que doutro xeito nos municipios pequenos como o noso serían máis complicados. Para todos, independentemente da súa cor política, a axuda da Deputación é imprescindible».
Ademais de promover un impacto positivo na vida da veciñanza, o Plan Único «supón tamén un impulso para a economía local, ao fomentar a contratación de empresas de construción, enxeñerías e outras de sectores relacionados, ao tempo que tamén se axuda a fortalecer o tecido empresarial local, se consolida o emprego e se contribúe a fixar poboación», subliñou o rexedor.
