O Concello de Boiro sacou a licitación o proxecto para a conversión a céspede artificial do Campo da Mina, en Lampón. O alcalde, José Ramón Romero, e o concelleiro de Deportes, Marcos Fajardo, realizaron este venres unha visita ás instalacións xunto a Manuel Ángel Dominguez, presidente do Sporting de Lampón, e Pablo Romero, membro da directiva do club, para detallar os aspectos do proxecto.
Con esta iniciativa búscase transformar o actual terreo, caracterizado por áridos e desniveis, por un campo de fútbol de céspede artificial con dimensións de 100×56 metros. O concelleiro de deportes destacou que está actuación permitirá dotar a Boiro con catro campos de céspede artificial e un de céspede natural, permitindo ter «cubertas as necesidades dos clubs do municipio«.
As obras incluirán a retirada do material deportivo existente, demolición de muros, excavacións e movementos de terra para a creación dun canal de formigón que recollerá as augas pluviais. Ademais, instalaranse colectores de saneamento e unha rede de drenaxe antes de proceder coa instalación da rede de rego e do céspede artificial.
O proxecto non se limitará exclusivamente á renovación do terreo de xogo, xa que tamén se incluirán parabalóns, barandillas laterais e melloras nos accesos. «Trátase dunha renovación integral do terreo de xogo e o peche perimetral dun campo histórico como é este e que poderá aumentar a súa actividade deportiva acollendo tamén encontros e adestramentos de categorías inferiores«, indicou o alcalde.
Pola súa banda, dende o club expresaron a súa gratitude pola implicación das administración que están a apoiar esta renovación, considerando a inversión como «moi necesaria debido ao mal estado no que se atopa o campo«, ademais de ser «un impulso» para o clube, con 52 anos de historia.
O orzamento total do proxecto ascende a 673.325,59 euros, financiados en parte pola Deputación da Coruña a través do POS+ adicional. Actualmente, o proxecto atópase en fase de licitación, e as empresas interesadas terán ata o 9 de abril para presentar as súas ofertas a través da Plataforma de Contratación do Sector Público.
