O remo tradicional galego vivirá unha fin de semana intensa no Barbanza coa celebración de dúas esperadas probas da Liga Galega de Bateis en Boiro e Ribeira.
Este sábado 22 será o turno de Boiro que acollerá a VIII Bandeira de Bateis Concello de Boiro, organizada polo Club de Remo Cabo de Cruz (CRCC). Pola súa banda, ao día seguinte a acción trasladarase a Ribeira coa organización polo Club de Remo Náutico de Ribeira (CNR) da VII Bandeira de Bateis Concello de Ribeira.
Preto de 100 equipos a competición
A oitava edición da bandeira boirense desenvolverase a partir das 10.30 horas no Bodión, nun cambio de localización obrigado polas previsións metereolóxicas, como destacaron na presentación o concelleiro de Deportes, Marcos Fajardo, e o presidente do CRCC, Luís Piñeiro.
Marcos Fajardo, esquerda, e Luís Piñeiro / Cedida
Nesta edición participarán tripulacións de todas as categorías: alevín, infantil, cadete, xuvenil, senior sub23 e senior absoluto, tanto femininas, que serán as primeiras en competir, como masculinas. As inscricións para participar están abertas ata a noite deste xoves, pero dende o Club de Remo Cabo da Cruz esperan unha gran participación. «Agardamos a participación de preto de 100 equipos«, sinalou Luís Piñeiro.
«Agardamos que a regata se poida celebrar con normalidade a pesar das condicións metereolóxicas. É unha proba moi bonita, na que participan as categorías base, por iso temos que garantir a máxima seguridade», afirmou pola súa banda o concelleiro.
Os equipos competirán por medallas de ouro, prata e bronce en cada categoría, ademais das bandeiras que se outorgarán aos clubs con mellor puntuación en categorías femininas e masculinas.
Ribeira toma o relevo cunha cita multitudinaria
O domingo 23 será a quenda da VII Bandeira de Bateis Concello de Ribeira, que reunirá preto de 500 deportistas e unhas cen embarcacións. O percorrido, duns 500 metros, terá variacións segundo as diferentes categorías e discorrerá entre o faro Lajareu e o Porto Comercial coa primeira saída prevista para as 11.00 horas.
O presidente do Club Náutico Ribeira, Jesús Silva, destacou a alta participación esperada, aínda que tamén mostrou a sús preocupación polas previsións metereolóxicas. «Esperamos contar con tódolos clubs xa que as derradeiras previsións do tempo non son moi boas, esperemos que nos deixe realizar a proba», sinalou. Ademais, incluso advertiu de que a Xunta podería cancelar a proba en caso de condicións adversas, recordando que xa foron suspendidos algúns adestramentos previos.
Pola esquerda, Luís Pérez, Jesús Silva, Vicente Mariño e Francisco Suárez-Puerta / Cedida
Pola súa banda, o alcalde de Ribeira, Luís Pérez, animou, «se o tempo o permite», a desfrutar «dunha competición que é tanto física como mental e á vez unha sincronía de movementos». Neste sentido, engadiu que se trata dunha proba que «aporta o valor do traballo en equipo xunto co esforzo diario de adestramento».
Con todo, se o clima non o impide, Boiro e Ribeira gozarán esta fin de semana con esta dobre cita deportiva que convetirá ao Barbanza no epicentro dos bateis e do remo.
