Outes acolle esta semana unha nova modalidade deportiva que combina exercicio físico con acción ecolóxica. Trátase do plogging (traducido como corre-colle), unha práctica que conxuga trotar ou camiñar mentres se recolle lixo ou se eliminan especies invasoras.
A primeira sesión en Outes esá organizada polo proxecto ReNatur_Outes, que leva máis de dous anos impulsando a renaturalización do río Tins. Esta nova iniciativa busca ampliar a participación cidadá na conservación ambiental, facendo da limpeza do contorno unha actividade accesible e lúdica.
Este primeiro torneo de plogging desenvolverase o domingo 16, en paralelo co Trail de Outes, co obxectivo de atraer a persoas de todas as idades. A actividade arrancará ás 9.30 horas na Casa da Cultura de Outes, onde os participantes poderán inscribirse antes da saída en dúas categorías: trote ou paseo. A sesión finalizará ás 11.00 horas, momento no que se entregarán premios aos participantes máis destacados en cada modalidade. Así mesmo, a organización proporcionará luvas e bolas de lixo a todas as persoas participantes.
Cartel de la jornada de ‘plogging’ en Outes / Cedida
Ademais, como preparación, ReNatur_Outes convocou unha xornada previa de voluntariado o venres 14 de 11.00 a 13.30 horas. Nesta sesión, na que tamén colaborarán as usuarias da asociación Misela, realizarase un primeiro esforzo de limpeza e eliminación de especies invasoras.
Cartel da xornada de recollida de lixo en Outes / Cedida
O proxecto ReNatur_Outes, liderado polo Concello de Outes, conta coa participación de investigadores das tres universidades públicas galegas, así como da Fundación Montescola e o CEER (Centro de Estudos Eurorrexionais Galicia-Norte de Portugal). Ademais, está apoiado pola Fundación Biodiversidad do MITECO, dentro do Plan de Recuperación, Transformación e Resiliencia (PRTR) financiado pola Unión Europea.
