Dende onte, xoves 17, ata o vindeiro domingo 9 de marzo, Boiro pon o traxe da diversión e cor para celebrar o Entroido cun cargado programa de actividades para todas as idades, cunha das axendas máis longas de todo o Carnaval galego, con excepción das grandes citas de Ourense.
A festa xa comezou onte na parroquia de Cabo de Cruz coa celebración do Xoves de Abadesas, personaxes que percorrerán hoxe a rúa peonila acompañadas da charanga Imperial.
Mañá, a Comisión de Festas da Boliña organiza a súa XVIFesta da Orella no Campo de Revelar dende as 19.00 horas. Ademais, o mesmo día, dende as 23.00 horas na Praza de Galicia, a Festa de Entroido Peñas Boiro AC promete diversión cos djs Marcos Magán, Toni Seijas e Xacobo de Mínimo Eventos.
O domingo será o día para os máis pequenos co desfile infantil, que sairá ás 17.00 horas da Praza da Mancomunidade e percorrerá a rúa peonil ata chegar á céntrica Praza de Galicia, onde haberá unha festa que incluirá gran chocolatada e festa infantil con DJ Matrek.
O Martes de Entroido, día grande, terá lugar o tradicional desfile e consurso de disfraces e carrozas, no que se repartirán 4.600 euros en premios. Percorrerá as rúas de Boiro xunto coa Batucada Cadabatú, As da Boina, A Dorniña de Abanqueiro e rematará na Praza de Galicia con DJ Matrek.
O domingo 9 de marzo, derradeiro día do Entroido, as parroquias serán testemuñas dos Enterros. A xornada comezará pola mañá en Cabo de Cruz co Entroido Crucense e o enterro do Farruco, e continuará en Praia Xardín co enterro da Cunca. Xa pola tarde será o enterro do Óso en Abanqueiro e o día rematará co enterro do Felipiño en Escarabote. Ademais, como xa é habitual, un tren percorrerá todos os enterros durante o día, facilitando o traslado entre eles á xente.
