O pleno do Concello da Baña aprobou os orzamentos municipais para este ano 2025, que acadarán unha cifra récord de 4,6 millóns de euros, dos que se poderán reservar preto de 953.00 euros para investimentos reais no municipio.
A maior parte dos ingresos das contas bañesas neste exercicio, o 66,9%, procederá das transferencias correntes de organismos como a Xunta de Galicia ou o Estado, mentres que arredor dun millón será recadado mediante impostos directos, taxas e prezos públicos e os 362.000 euros restantes chegarán a través de transferencias de capital doutras administracións ou entidades privadas.
A meirande parte destes fondos irán destinados á cobertura das prestacións ás que ten acceso a cidadanía, xa que dous millóns serán para gastos correntes e servizos e sobre millón e medio irá dedicado aos gastos do persoal municipal. Así mesmo, 179.000 euros quedan reservados para transferencias correntes, as achegas do Concello a familias asociacións e outras entidades.
Deste xeito, quedan 953.000 euros para investimentos, dos que a maior partida (por encima dos 100.000 euros, sen ter en conta o aporte da Deputación) irá para a mellora da estrada Lañas-Paramos. Outros proxectos a ter en conta son o abastecemento de auga en Nantón, o saneamento en Vilar Novo ou a rede de distribución de auga potable na parroquia do Barro.
No pleno tamén se debateu o destino dos fondos dos diferentes programas do Plan Único provincial, que irán a gasto corrente, obras para a traída de auga e o reforzo dos servizos sociais municipais mediante a contratación de máis persoal e o financiamento da axuda no fogar.
Festa da Filloa da Pedra
Ademais, a Corporación municipal bañesa acordou por unanimidade demandar da Xunta de Galicia a declaración da Filloa da Pedra como Festa de Interese Turístico de Galicia, posto que entende que se cumpren os criterios requiridos: ser unha celebración con máis de vinte anos de antigüidade, características singulares, arraigo popular e un claro carácter participativo.
