O grupo municipal do BNG en Brión rexistrou un escrito no concello para esixir medidas de mellora da seguranza viaria no paso de peóns ubicado debaixo da autovía AG-56, que conecta Santiago de Compostela con Noia e Porto do Son.
En concreto, a formación nacionalista demanda que se interveña na rotonda que conecta esta vía de altas capacidades coa avenida de Santa Minia, unha das principais arterias de tráfico da localidade. Por este paso de peóns, indican, cruzan a diario moreas de persoas, dada a proximidade deste tramo con dous centros de ensino: o CEIP de Pedrouzos e o IES de Brión.
De acordo co voceiro municipal do BNG, Xosé Penas, este é un “punto negro” na seguranza viaria do concello e áchase “mal iluminado e insuficiente sinalizado”, polo que resulta “especialmente perigoso durante as primeiras horas da mañá” ou con meteoroloxía adversa.
“Ata o de agora tivemos sorte de que os incidentes rexistrados non tiveron consecuencias graces, pero pode acabar habendo unha desgraza se non se toman medidas”, engadiu, antes de precisar que se trata dunha estrada de titularidade autonómica, mais na que a seguridade corresponde ao Concello.
