Asturies remató 2024 con menos de 70.000 autónomos afiliaos a la Seguridá Social. La comunidá nunca concluyera un añu per debaxo d’esi rangu dende 2006, fai cuasi dos décades. Esto ye, el trabayu por cuenta propia nel Principáu llogró caltenese perriba de los 70.000 cotizantes inclusive a lo llargo de la Gran Recesión –los años posteriores al españíu de la crisis financiera global de 2008– y la pandemia de covid, especialmente llaceriosa pa los profesionales independientes de sectores como’l comerciu o la hostelería.
En concretu, según les estadístiques de la Seguridá Social, la media d’autónomos n’Asturies n’avientu pasáu foi de 69.900, un amenorgamientu de 643 al respeutive del mesmu mes de 2023. Esto significa qu’Asturies foi la tercer comunidá autónoma española que más trabayadores por cuenta propia perdió nel 2024 acabáu de recién. Namás Castiella y Lleón, con 1.584 afiliaos menos, y Galicia, con una cayida de 799, sufrieron una mayor sangría. Nel conxuntu del país producióse un incrementu de 42.396 profesionales, una meyora porcentual del 1,3%.
La perda d’autónomos n’Asturies apunta a dellos cambios nel texíu económico, por aciu de que l’añu pasáu ganáronse 7.009 afiliaos a la Seguridá Social, un 1,84% más, hasta los 387.082. Esta meyora débese a les 7.894 incorporaciones al réxime xeneral de la Seguridá Social, que compensaron les mentaes 643 baxes nel sistema d’autónomos. La mayoría de los empleos creáronse nel sector servicios, cola hostelería, la loxística y la sanidá como motores.
Ello ye qu’ún de los posibles factores d’esta evolución hacia más contrataciones como asalariaos y menos altes como autónomos ye la tresformación del sector hosteleru, con muncho pesu n’Asturies. Dende va años, en tol país ta produciéndose un enclín a establecimientos más grandes y con mayor plantía, mentanto van sumiendo negocios más pequeños. Esto espéyase bien nos datos d’afiliación de la hostelería n’agostu, el mes turísticu por antonomasia. Asina, n’agostu pasáu, Asturies rexistró 30.495 asalariaos, 2.335 más que cinco años primero, mentanto que’l númberu d’autónomos foi de 9.208, un recorte de 534 nel mesmu períodu.
Otru elementu clave del trabayu por cuenta propia ye la inmigración estranxero. Nel últimu llustru, el númberu de trabayadores independientes foriatos disparóse un 55%, hasta algamar los 4.298, mentanto que nel mesmu períodu los autónomos nacionales baxaron un 6,7%, asitiándose anguaño nos 65.669.
«Cola ayuda del Gobiernu del Principáu d’Asturies»
