La xeneración llétrica con carbón n’España algamó a lo llargo del añu 2024 los 2.956 gigavatios hora, lo que supunxo’l 1,1% de tola xeneración llétrica del sistema nacional. La mayor parte d’esta enerxía a partir de la quema de carbón producióse na central térmica d’Aboño, en concretu nel grupu 2.
La producción llétrica con carbón ta nunos niveles ínfimos al respeutive de los años nos que taben a plenu rendimientu múltiples térmiques de carbón n’España, cuando les centrales termollétriques llevaben ún de los cachos principales de la tarta llétrica.
La descarbonización tornó la xeneración llétrica y amás d’amenorgar, la producción con carbón sigue cayendo. Los 2.956 xigavatios hora del añu pasáu son un 23,6% menos que los que se xeneraron con carbón en 2023.
La mayor parte de la lletricidá a partir de carbón xeneróse en 2022 n’Aboño II, con unos 360 díes de funcionamientu, mentanto qu’Aboño I, un grupu térmicu más antiguu y con menos inversiones medioambientales, tuvo activu 7 díes. Les otres centrales térmiques de carbón que tuvieron operatives fueron Sotu IV y Los Barrios que funcionaríen 29 y 47 díes, respeutivamente, según los datos que remana Ecoloxistes n’Acción a partir de les estadístiques del xestor del sistema llétricu.
«Cola ayuda del Gobiernu del Principáu d’Asturies»
