Les trés ayalgues etnográfiques de La Corredoria (Uviéu) vuelven a rellumar nel parque de La Cabornia. Los operarios contrataos pa iguar los horros treslladaos nel so día dende la zona del Conceyín como testimoniu de les caseríes que dieron llugar al anguaño populosu barriu esperen rematar «en díes» una igua pola que nagüen dende va un llustru dellos coleutivos y vecinos a títulu individual. «Caltuvimos, na midida de lo posible, los materiales orixinales», esplica Miguel Ángel Arenales, l’artesanu contratáu pol Conceyu pa «resucitar», a cambiu de 20.000 euros, la construcción que taba más estropiada depués d’una quema en 2019.
La recuperación de los trés horros entamóse per aciu de dos llinies d’actuación desenvueltes en paralelu. Mentanto l’artesanu especializáu y dos operarios de la so empresa dedicaben los dos últimos meses a reconstruyir la cubierta, les parés y el corredor estrozaos poles llapaes, dellos trabayadores de la contrata municipal de caltenimientu d’edificios encargáronse d’iguar los daños estructurales de los otros dos horros. Estos últimos, magar nun tar tan afectaos, presentaben un avanzáu deterioru pola mor del pasu del tiempu y la falta de caltenimientos periódicos.
Los trabayos empezaron el 14 d’ochobre pasáu énte la sorpresa de munchos vecinos que yá se resignaron a ver cayer les sos ayalgues etnográfiques. L’equipu de gobiernu d’Alfredo Canteli marcóse como prioridá pa «enantes de terminar l’añu» la culminación d’esta allampada recuperación.
Los trabayos del horru más afectáu y alloñáu de la estación del tren, resultaron mui trabayosos. El personal contratáu viose obligáu a desmontar pieza a pieza la estructura y tratar caúna de manera individualizada pa depués volver montales. El desmontaxe obedez a qu’ún de los dos trabes inferiores –vigues ente la caxa y los pegollos– taba rotu, quemáu y encontiáu. La quiebra producióse por aciu de qu’estos elementos aguantaben un gran pesu por arreglos previos fechos con métodos malcuriosos.
El montaxe empezó fai un poco más d’un mes. El corredor y les columnes destruyíes pol fueu fueron repuestes con pieces de nueva fabricación con madera de castañal. Tamién se-y mangaron nuevos materiales a la cubierta, irrecuperable pola quema.
Per otru llau, rescatáronse los balustres de la barandiella, dándo-yos tratamientu nel tornu, para lixarlos, y, darréu, da-yos tinte de nozal pa llograr un resultáu rústicu. Amás, aprovecháronse trés de los lliños –vigues sobre les que posa’l teyáu–, una y bones el cuartu taba perdeterioráu.
La igua de los otros dos horros asitiaos na mesma zona verde, a escasos cincuenta metros, foi muncho más cenciella. Dambos fueron andamiaos pola contrata de caltenimientu de los edificios, instalaciones y otros elementos del patrimoniu municipal, según esplicaron fontes del gobiernu municipal, entusiasmaes col resultáu d’una de les actuaciones más demandaes de los últimos años nel barriu más pobláu de la capital asturiana.
«Cola ayuda del Gobiernu del Principáu d’Asturies»
