Más de 5.100 asturianos, en concretu 5.198, marcharon a trabayar a otra comunidá autónoma l’añu pasáu, según los datos qu’acaba d’asoleyar l’Axencia Tributaria relativos a la movilidá del mercáu llaboral n’España. De tolos que marcharon y tributen, por ello, n’otra comunidá, la mayoría fixéronlo a Madrid (1.612) y a Castiella y Lleón (783). Coles mesmes, dambes comunidaes son tamién el llugar de procedencia más habitual de los que vinieron trabayar al Principáu: 1.251 de la capital d’España y 822 de la comunidá vecina.
La movilidá llaboral nel conxuntu del país disparóse con 230.000 persones que camudaron de comunidá, un 53,7% más qu’en 2022. Nun s’inclúin nesta estadística de l’Axencia Tributaria a País Vascu y Navarra al tener un sistema fiscal propiu.
La falta d’oportunidaes llaborales amañoses pa cola formación y necesidaes tuvo tradicionalmente detrás de les causes qu’emburrien a los asturianos a emigrar non solo al restu d’España, sinón tamién al estranxeru. Ello ye que’l Principáu ta ente les autonomíes con saldu negativu tocantes a movilidá llaboral, esto ye, son más los que marchen fuera a trabayar que los que vienen.
Despoblamientu rural
Nel balance, el Principáu pierde 506 persones. Al par d’Asturies tamién presenten saldu negativu Andalucía, con más de 6.000 perdes; Estremadura, con más de 3.500; o Castiella y Lleón, con alredor de 3.000, por citar les más llacerioses. Toes elles comparten el problema del despoblamientu rural y l’avieyamientu. Al mandu de les que llogren saldu positivu de trabayadores –son más los qu’aporten que los que marchen– asitien la Comunidad Valenciana, con 4.779 persones, y Madrid, con cuasi 4.200, siguíes anque bien separaes por Cataluña y Baleares, alredol dambes dos de les 2.200.
«Cola ayuda del Gobiernu del Principáu d’Asturies»
