A conselleira de Medio Ambiente e Cambio Climático, Ángeles Vázquez, urxe ao Goberno central a aclarar cal é o estado das reclamacións polo dano ambiental e os custos derivados da limpeza e vixilancia das praias como consecuencia da perda dun contedor de pélets por parte do mercante Toconao fronte ás costas portuguesas en decembro de 2023.
Vázquez visitou a praia de Queiruga (O Son), onde dixo que o Executivo central «non actuou axeitadamente para reclamar polos prexuízos causados, tanto á armadora como á aseguradora» e anunciou que a Xunta presentará un recurso de alzada «contra o silencio do Ministerio para a Transición Ecolóxica e o Reto Demográfico á hora de atender a reclamación por responsabilidade ambiental «e lograr avances neste eido», ao tempo que negocia extraxudicialmente cos representantes da navieira para que afronte os custos derivados do suceso.
A conselleira lamentou «o escurantismo e o inmobilismo que caracterizaron a xestión do incidente por parte do Goberno central». «Portugal comunicou ao español o 8 de decembro a perda dos contedores, pero este non llo trasladou a Galicia ata 25 días despois. Ademais, apenas mobilizou medios para mitigar a chegada dos pélets á costa galega malia as peticións da Xunta», sinalou.
A conselleira engadiu que a Xunta «actuou coa máxima celeridade e responsabilidade en canto tivo coñecemento do suceso e activou un dispositivo por terra, mar e aire no que, nalgúns momentos, chegaron traballar nas praias máis de 400 persoas».
Dito operativo actuou en máis de 630 praias de 66 concellos costeiros e tivo un custo estimado para o Executivo autonómico de máis de 2,3 millóns de euros, «que non teñen que pagar as galegas e os galegos, pois non teñen ningunha responsabilidade nos feitos», dixo a conselleira.
As tarefas desenvolvidas nos areais e no mar polo persoal mobilizado pola Xunta permitiron retirar 3.650 quilos de pélets (o equivalente a 150 sacos de 25 quilos dos máis de 1.000 que levaba o Toconao) e máis de 20.200 quilos de lixo asimilable a residuos urbanos que se retiraron no dispositivo. A eles engadíronse 1.400 quilos de pélets recollidos por voluntarios ou polos concellos, co que foron retirados máis de 5.000 quilos de granulados plásticos, o equivalente a 200 sacos. Estes residuos, a navieira non reclamou, foron valorizados por Sogama.
