O Concello de Camariñas licitou en 121.883 € a reforma da Casa do Mar de Camelle, que supón o primeiro paso para rehabilitar o edificio e poñelo ao servizo da veciñanza como centro de ocio.
Os traballos inclúen a renovación da cuberta, a reparación das vigas e a lousa, a instalación do sistema de impermeabilización e illamento e, por último, a execución e pintado da nova cuberta.
Ademais, neste proxecto tamén se contempla a renovación da vía que dá acceso ao edificio.
«O obxectivo é rehabilitar por completo a Casa do Mar e convertela nun espazo de ocio, respondendo así unha antiga demanda dos veciños e veciñas da parroquia», explica a alcaldesa de Camariñas, Sandra Insua, quen engade que «despois da renovación da cuberta a nosa idea é acondicionar a estrutura e as fachadas, reorganizar a primeira planta e repoñer os acabados».
«A intención é ir rehabilitando o inmoble pouco a pouco para poder facer uso del e que a veciñanza de Camelle teña un espazo en condicións para poder facer actividades, xa que a Casa de Man está quedando pequena e Camelle é unha das parroquias onde os nenos e nenas máis participan nas actividades que organiza o Concello», explica Sandra Insua.
