La Conseyería de Cultura, Política Llingüística y Deporte va entamar los díes 22, 23 y 24 de payares en Santalla d’Ozcos la tercer edición de Xuntoiro, un alcuentru que fomenta l’intercambiu de conocimientu y esperiencies ente les industries culturales qu’utilicen el gallego-asturianu.
Depués de pasar per A Veiga y El Franco, esti añu va ser Santalla d’Ozcos el conceyu que va acoyer íntegramente un programa d’actividaes que xira alredor de la llingua y cultura del territoriu más occidental d’Asturies.
Nesta edición nueva va haber propuestes musicales, conferencies, lliteratura, artes escéniques, espectáculos pa neños y neñes, mercáu popular, biblioteca ambulante, proyeición d’audiovisuales o visites guiaes a equipamientos. Les actividaes son gratuites y pa tolos públicos.
El programa principia’l vienres 22 de payares con una xornada mañanera dedicada específicamente a los más pequeños. Depués va llegar el turnu d’otres propuestes como talleres, sesiones de cuentacuentos, teatru, recitales, presentaciones de los últimos trabayos editaos en gallego-asturianu o la nueche del rock nesta llingua.
Cartel de los encontros Xuntorio. / Principáu d’Asturies
Tamién tán programaes otres acciones como la proyeición d’audiovisuales en gallego-asturianu o visites a la Casa Natal del Marqués de Sargadelos y la ruta de les escultures de Santalla. Amás, nos trés díes va circular una biblioteca ambulante dotada con obres editaes nesta llingua. El sector hosteleru del conceyu tamién va formar parte del Xuntoiro, porque chigres y restaurantes van repartir poemes impresos en marcapáxines a los sos veceros.
«Cola ayuda del Gobiernu del Principáu d’Asturies»
