O portavoz de Pesca do PSdeG no Parlamento de Galicia, Julio Abalde, denunciou que Xunta e PP «estanse situar de costas ao sector marisqueiro ao negarse a regular o baleirado dos encoros para evitar a perda de produción marisqueira».
Así o dixo logo de que o PP anunciara o voto en contra dunha proposición non de Lei que presentou na Comisión de Pesca do Parlamento para reclamar un protocolo de baleirado dos encoros.
O responsable socialista alertou de que a decisión de abrir a presa do Tambre con marea baixa durante o temporal Kirk baixou a salinidade da auga e danou unha cuarta parte do berberecho da ría de Noia, un feito que «podería evitarse facilmente se o Goberno galego tomara cartas no asunto».
Abalde reclamoulle ao Goberno galego que exerza as súas competencias para permitir compatibilizar os intereses dos responsables das eléctricas e de todo o sector marisqueiro.
Asimesmo, criticou que a Xunta «se negue a buscar acordos coas eléctricas, demostrándolles que non perden diñeiro coa apertura regulada dos encoros, e apelar á súa responsabilidade social para favorecer a existencia doutros sectores produtivos».
Abalde emprazou á Xunta a asumir a «decisión política» de facer caso aos científicos, «que nun encontro sectorial en Vigo o pasado mes de outubro recomendaron unha xestión intelixente dos encoros para non matar o marisco».
