Héctor Braga va inaugurar esti xueves la decimoquinta edición del ciclu «De Castilletes y Carbón», entamáu pol Conceyu de Llangréu y la Fundación Nuberu. El músicu ya investigador llangreanu va presentar na casa de los Alberti, en Ciañu, el so trabayu «Nel cantu la memoria», un ensayu sobre l’asturianada tradicional col que llogró’l Premiu Maximo Fuertes Acevedo l’añu pasáu.
Son yá quince años nos que la Fundación «Nuberu» y el Conceyu llangreanu collaboren pa desarrollar estes xornaes culturales. Cine, lliteratura, música, pintura, gastronomía, too en xunto col fondu de la tradición minera y de la llucha polos derechos sociales.
La programación inclúi’l ciclu de películes y documentales, «Baxando pa la galería», con proyeiciones nel cine Felgueroso de Sama. Asina, el 13 de payares podrá vese «Ice Road», de Jonathan Hensleigh, y el 27 de payares va echase «Amanecer en puerta escura», de José María Forqué. Les sesiones son a les 19.30 hores.
Amás d’esti ciclu, la programación inclúi tamién «Los xueves de Castilletes y Carbón» na Casa de los Alberti. Nesti apartáu ta la conferencia inaugural d’Héctor Braga, pero tamién otres actividaes. El 14 de payares, a les 20.00 hores, Rafael Sánchez Avello va falar de la hestoria del periodismu n’Asturies. El 21 de payares analizaráse «El procesu traductor del cómic n’asturianu, el casu Asterix», con Xesús González Rato y Xandru Martino Ruz. Una selmana dempués, el día 28, tamién a les 20.00 hores, va tener llugar un recital lliterariu sol nome «Compañeru, dame tira», nel que van participar Blanca Fernández Quintana, Xulio Vixil Castañón y Xosé Ánxelu Morán. L’alcuentru lleva la coordinación de Chechu García.
La tercer pata de la programación de «De Castilletes y carbón» ye la esposición de les obres del Concursu Internacional de Fotografía dixital «La Mina y la Mar» qu’entama la Sociedá de Festexos y Cultura San Pedro de La Felguera. L’amuesa puede visitase yá y va tar na Casa de los Alberti de Ciañu hasta’l próximu 15 de payares.
Música, cine, conferencies, lliteratura y esposiciones pa reivindicar la cultura minera y los movimientos sociales que lleva acomuñaos. Asina lo lleven faciendo a lo llargo de trés llustros la Fundación «Nuberu» y el Conceyu de Llangréu con esta programación cultural qu’esti añu dura casi un mes.
«Cola ayuda del Gobiernu del Principáu d’Asturies»
