Va dos años y medio que, por desgracia, la siguiente escena convirtióse en daqué habitual n’Ucrania: families que, de sutrucu, vense sumíes na escuridá. Nun ye en so casa namás, sinón na de los vecinos, en tol edificiu, en tol barriu, en tola ciudá, en tola rexón. Los repentinos cortes de lluz –por aciu de los ataques rusos a les infraestructures eléctriques del país y a los apagones executaos darréu pol Gobiernu ucranianu pa compensar el déficit de suministru– son una constante dende la invasión rusa en febreru de 2022, obligando a los ciudadanos a buscar alternatives p’aportar a fontes d’enerxía y siguir coles sos vides dientro de tola normalidá que puede tener una guerra que se cobró decenes de miles de muertos.
Asturies ta echando un gavitu pa solliviar esa falta. La empresa uvieína Bexie Group, dedicada a la fabricación de bateríes p’almacenar enerxía y cargadores pa vehículos eléctricos, desarrolló unos sistemes autónomos d’almacenamientu d’enerxía discurríos pa situaciones d’emerxencia (guerres, desastres climatolóxicos…) nes que ye difícil o imposible aportar a una rede d’eletricidá.
Ello ye que se trata d’un oxetu negru d’unos 25 kilos de pesu, asemeyáu a una maleta. La so potencia anda ente 600 y 1.000 vatios y tien capacidá p’hasta seis bateríes. Puede funcionar tanto conectáu a una rede eléctrica doméstica o de forma autónoma (esti sería’l so verdaderu propósitu n’escenarios de crisis), y puede ser operáu por aciu d’una pequeña pantalla o al traviés d’una aplicación móvil, yá que dispon de conexón a wifi.
Exemplar del sistema «Micro All-in-One» esportáu a Ucrania. / LNE
Precisamente por tar pensáu pa casos d’emerxencia, l’equipu puede montase en menos de diez minutos. Amás, tien capacidá p’aguantar temperatures d’hasta 15 graos baxo cero, y ta protexíu contra’l polvu y los chorros d’agua.
Empreses d’Ucrania acomuñaron apocayá p’adquirir llotes d’estos equipos colos que facer frente a los frecuentes cortes d’eletricidá que sufre’l país, según indiquen fontes de Bexie Group. «L’esplegue d’estes unidaes representa un sofitu crucial pal sistema eléctricu d’Ucrania, en momentos de tan estrema necesidá», apunten les fontes.
El productu, denomináu «Micro All-in-One», foi diseñáu pol personal que la compañía tien repartíu ente Asturies y China. Nel país asiáticu, la empresa tien fábriques nes ciudaes de Shangqiu, Wuxi y Shanghai. Ellí, Bexie produz bateríes p’almacenar enerxía, cargadores pa vehículos eléctricos ya inversores que permite disponer de la enerxía xenerao por paneles solares. El «All-in-One» ye un productu híbridu, un amiestu de batería ya inversor.
El 80% de los productos destínense a la esportación, con destinos –amás d’Ucrania– como Inglaterra, Lituania, Chipre, Grecia, Italia, Austria, Alemania, Bosnia-Herzegovina, Francia o Polonia.
Amás, Bexie ye’l distribuidor internacional de los paneles solares fabricaos por otra empresa asturiana, Exiom, que nestos momentos tien en fase de prebes la so nueva planta industrial en Llangréu.
Con sede n’Uviéu, Bexie cuenta treslladase a empiezos de 2025 a una nave de 2.000 metros cuadraos nel polígonu industrial de Sia Copper, en Llugones (Siero). Ellí van allugase les oficines centrales, un almacén y un llaboratoriu d’I+D. Pa too ello, la compañía va facer una inversión de 8 millones d’euros.
«Cola ayuda del Gobiernu del Principáu d’Asturies»
