A Xunta aprobou este luns o Plan de xestión da paisaxe protexida Os Penedos de Pasarela e Traba co reto principal de fixar un marco de referencia específico e duradeiro que garanta a compatibilidade entre a preservación e os diferentes usos públicos deste macizo granítico, localizado nos concellos de Laxe e Vimianzo. Articulado arredor de catro grandes obxectivos, trátase do primeiro instrumento de xestión dunha paisaxe protexida que se aproba en Galicia e nel identifícanse os valores principais que hai que protexer e os posibles riscos que poderían afectarlles, establécense as normas de uso e aproveitamento do territorio e dos seus recursos e determínanse as actividades permisibles para a conservación do espazo e dos hábitats que alberga.
En concreto, o plan márcase como obxectivos garantir a conservación e a protección do patrimonio natural, cultural e inmaterial existente neste espazo e avanzar no fomento do coñecemento, a investigación, a educación e a relación sustentable e harmoniosa entre a contorna, a poboación local e os visitantes. Todo este traballo canalizarase a través de 28 medidas que se desenvolverán nos próximos anos e para as cales se prevé un investimento estimado inicialmente en 0,6 millóns de euros. Entre esas actuacións previstas cómpre destacar a elaboración dun plan de acción da paisaxe, a recuperación da biodiversidade e da conectividade coa plantación de árbores autóctonas fronte ás repoboacións con piñeiros ou a posta en marcha dun programa de erradicación de especies exóticas invasoras e de detección temperá de alóxenas.
Penedo bautizado como O Coello e o Paiaso triste / Cedida
Tamén está previsto acometer un traballo de inventariado da toponimia e das lendas asociadas ao lugar ou un estudo arqueolóxico da Torre da Moa, onde, ademais, se mellorará a accesibilidade ao miradoiro e a sinalización. Así mesmo, está previsto crear un aparcadoiro na zona do cruzamento do Brañal, a execución de accións de mantemento das vías e de limpeza e roza nas infraestruturas públicas existentes ou a instalación de paneis interpretativos e informativos. Ao respecto, mellorarase e reforzarase a sinalización, prestando unha atención especial aos lugares de maior interese e atractivo, como poden ser os principais miradoiros panorámicos dos penedos (Atalaia, Pico das Gaias e a xa mencionada Torre da Moa), os puntos de inicio e cruzamentos das rutas de sendeirismo existentes ou os xacementos.
Penedo O Tiburón na Paisaxe protexida de Pasarela e Traba / Cedida
Outro dos obxectivos é o fomento do coñecemento e da investigación sobre este espazo protexido coa elaboración de estudos sobre os efectos do cambio climático no lugar e a conectividade ecolóxica e coa realización de actividades de sensibilización dirixidas tanto a escolares de centros da zona como á poboación en xeral. Nesta liña, organizaranse visitas guiadas da man de xeólogos e elaborarase novo material divulgativo.
O Sherlock Holmes canino dos Penedos de Pasarela e Traba / XMLS
As determinacións contidas no plan serán de obrigado cumprimento para as administracións públicas e para os particulares e prevalecerán sobre o ordenamento urbanístico. En todo caso, o plan prevé que se poidan seguir realizando os usos e actividades tradicionais que ata agora non causaron impactos sobre o medio. Neste sentido, cómpre indicar que a maior parte dos terreos incluídos nesta paisaxe protexida corresponden con propiedades privadas, un espazo altamente parcelado e no cal actualmente predomina o aproveitamento forestal.
O Cantor dos Penedos de Pasarela e Traba / Cedida
Os Penedos de Pasarela e Traba, declarados paisaxe protexida mediante decreto aprobado en decembro do ano 2008, conforman un territorio constituído por un conxunto de elevacións graníticas que ocupan unha superficie de 212 hectáreas enmarcadas na grande área paisaxística de chairas e fosas occidentais, en plena Costa da Morte. No seu conxunto, o macizo debuxa un espiñazo alongado de case 2,5 quilómetros de norte a sur, coa Torre da Moa como punto máis alto (274 m) e cunha xeomorfoloxía moi representativa e de gran valor. Existen tamén outras formacións menores subordinadas ao macizo principal e que lle confiren ao conxunto xeolóxico un enorme valor.
O Cráneo e a Cascuda nos Penedos de Pasarela e Traba / Cedida
Ademais da relevancia estética e paisaxística deste espazo, que actúa como balcón natural ao Atlántico, tamén ten un enorme valor científico porque permite coñecer a evolución da paisaxe nesta zona. Deste xeito, os penedos indican non só a súa relación con longos procesos tectónicos durante os que as rochas foron fracturadas, erguidas ou afundidas, senón o papel que tiveron na súa orixe as condicións climáticas do pasado.
Desde o punto de vista da biodiversidade, este rico territorio dividido entre Laxe e Vimianzo alberga importantes formacións de piñeiros, especies asociadas aos afloramentos rochosos, matogueira, prados, bosques de loureiro, de ribeira e carballeiras, mentres que os animais cunha maior presenza son as aves e os mamíferos.
