El pozu Santa Bárbara de Mieres yá ta llistu p’acoyer la so próxima esposición artística internacional. Nesti casu la protagonista va ser la obra de la francesa Jeanne Susplugas, que va presentar la coleición «Tase meyor en casa que nenyures», qu’axunta dalgunos de los sos trabayos clave. L’amuesa inaugurará’l 30 d’ochobre, y va poder vese hasta’l 7 de xineru, con entrada gratuita.
Jeanne Susplugas ye una artista multidisciplinar que, nel espaciu artísticu del pozu turonés, pretende «somorguianos nel so universu introspectivu de tintes surrealistes, tan críticu como poéticu». La muestra, impulsada pola Conceyalía de Cultura y pol comisariáu LEV (Llaboratoriu d’Electrónica Visual), pescuda «el conceutu de llar como un espaciu simbólicu, onde s’entrellacien la intimidá y les tensiones contemporanees».
Jeanne Susplugas / Jeanne Susplugas
Los organizadores de la esposición espliquen que Susplugas emplega na so obra una estética qu’a primera vista puede abultar «inclusive naif», con muncho coloríu y formes bien definíes. Detrás d’esta apariencia prestosa, allegre, «escuende una fondura esmolecedora». Per aciu «del humor, el cinismu y la ironía, l’artista convídanos a una reflexón crítica que tresforma la esperiencia estética nuna esploración de la complexidá humana». Ente les temes que sopelexa l’artista francesa na so obra tán la salú mental, l’escosamientu emocional, l’alienación o la medicalización de la sociedá.
Flying house / Jeanne Susplugas
Nel Santa Bárbara van poder vese pieces que van dende grandes instalaciones escultóriques a vídeos o inclusive una esperiencia en realidá virtual. La primera d’estes obres ye «There’s no place like home» «Tase meyor en casa que nenyures», que xuega con una icónica frase de «El magu d’Oz». Tamién van tar les obres «Flying house» (Casa voladora), «I will sleep when i’m dead» (Voi dormir cuando tea muertu) o «La maison malade» (La casa enferma), siendo esta postrera una crítica direuta a la «medicalización escesiva de la vida occidental».
Natural de Motpellier y residente en París, Jeanne Susplugas enseñó la so obra alredor de tol mundu, dende Berlín a Shanghái, pasando per Roma, Alexandría, Dublín, Miami o Madrid y, como non, París.
Los horarios de la esposición van ser, de martes a vienres, de 16 a 20.30 hores. Sábados, domingos y festivos, de 11 a 14 hores y de 16 a 20.30 hores. Los díes 24, 25 y 31 avientu, y el 1 de xineru, va tar zarrada. El día de Reis l’apertura va ser de 16 a 20.30 hores.
El pozu turonés convirtióse nos últimos años nun espaciu de referencia pal arte moderno nel norte d’España. Anthony McCall foi quien primero se xubió a la xaula. L’estudiu italianu «Fuse», el que salió del últimu relevu, hasta la próxima llegada de Susplugas. Y ente ún y otros, Hermino, Regine Schumann y Andy Thomas dieron tira nel pozu Santa Bárbara. Depués de la conversión, en 2021, d’esta icónica mina (el primer pozu declaráu Bien d’Interés Cultural, BIC) nun centru d’arte, cuasi 20.000 persones yá disfrutaron de les distintes intervenciones artístiques qu’acoyó.
«Cola ayuda del Gobiernu del Principáu d’Asturies»
