«Pauline en la Playa», la banda xixonesa liderada poles hermanes Mar y Alicia Álvarez, presenta «Yo podría ser John Wayne», el primer adelantu del que va ser el so octavu trabayu discográficu , «Los días largos», que van asoleyar dientro de dos meses.
«Pauline en la Playa» ye una referencia de la música independiente nacional dende los años 90. Les hermanes Álvarez, qu’empezaron en «Undershakers», en 1994, van pol so octavu discu y calecen motores pa la so presentación, col cantar «Yo podría ser John Wayne», que punxeron yá en circulación.
Nel so nuevu cantar, Mar y Alicia Álvarez xueguen a imaxinar toles vides posibles d’una sola persona. Elles mesmes, ensin dir más allá, podríen ser John Wayne. El tema tien un aire señardosu, les harmoníes vocales y les melodíes redondes qu’identifiquen la música de «Pauline en la Playa», con un aire, avancen, «cuasi hipnóticu» y un soníu que denominen «western pop».
El videoclip del cantar foi grabáu pola productora «Cortexiphan» n’Asturies, na sablera del Espartal, en Castrillón, nel monte-xardín de la Fonte Baxa, en L.luarca, y nel Parque Arqueolóxicu-Natural de la Campa Torres, en Xixón.
El tema produciéronlu les hermanes Álvarez xunto col prestixosu inxenieru y productor Luca Petricca, col que trabayaron en toles canciones de «Los días largos».
Petricia tamién ye’l productor del so anterior discu, «El salto», grabáu en Xixón en 2019 nel estudiu «Sonidópolis» y entemecíu nos estudios «Reno» de Madrid.
Mar y Alicia Álvarez compaxinen la so actividá musical en «Pauline en la Playa», con otros intereses. En 2010 Mar Álvarez púnxose al mandu de «Petit Pop», un popular grupu de música familiar, y Alicia Álvarez echó a andar la editorial «La Fabriquina», na qu’edita discos y llibros n’asturianu.
«Cola ayuda del Gobiernu del Principáu d’Asturies»