Un neno e unha muller tiveron que ser auxiliados esta tarde en Caión (A Laracha) ao resultar feridos cando practicaban surf xunto con outras persoas. A muller levou un golpe e permaneceu sobre unhas rochas ata ser evacuada da zona.
Arredor das 15.30 horas, un particular contactou co 112 Galicia para alertar de que unha parente súa quedara illada e ferida sobre unhas rochas fronte ao porto. Durante a súa chamada, o alertador indicou que a vítima ía nunha táboa de surf xunto a máis xente cando bateu contra unhas rochas, onde continuaba á espera de poder ser rescatada.
Os xestores do 112 Galicia informaron rapidamente ao Servizo de Urxencias Sanitarias de Galicia-061, Salvamento Marítimo, Servizo de Gardacostas de Galicia, Garda Civil da Coruña, Agrupación de Voluntarios de Protección Civil da Laracha e aos socorristas de Caión.
Os membros de Protección Civil solicitaron asistencia sanitaria, aínda que non só para atender á muller ferida. Segundo lle indicaron ao 112 Galicia, un rapaz, que se atopaba tamén nas rochas, conseguira chegar a terra cunha táboa de pádel e presentaba varias feridas e mazaduras. Mentres, unha lancha particular desprazábase ata o lugar onde agardaba a ferida.
Xa con ambas persoas fóra de perigo, estas foron atendidas nunha ambulancia das urxencias sanitarias e trasladadas ata o Hospital Universitario da Coruña.
