La costera de bonitu entamada’l pasáu mes de mayu llega al so ecuador y en llinies xenerales el so desarrollu ye satisfactoriu pa los pescadores asturianos, beneficiaos por una regularidá de captures que ta siendo balsámica pa les maltrechas rentes d’un sector qu’esti añu dio por perdida la campaña primaveral de la xarda –apellidada como «la peor de la hestoria»– y salvó los muebles na primer metá del añu gracies a la captura de merluza.
Ye por eso que s’esperaba con suma espectación la costera más importante del branu, que como nota llamativa vieno adelantada pa lo que suel avezar. Los grandes báramos de bonitu dexáronse ver bien ceo –mediaos de xunu– por agües asturianes y eso fixo tarrecer que’l pasu de los túnidos nel so pelegrinaxe escontra agües del Este del Cantábricu fuera esmanáu. Finalmente, nun foi asina y les bancaes tán asitiaes n’árees que tomen dende la vertical de cabu Peñes hasta la marina de Cantabria, un escenariu aparente pa les incursiones pesqueres de la flota asturiana de cacea (pesca del bonitu con cañes).
Los entendíos na materia destaquen que los bancos de bonitu tán «abondo esfarrapaos» nel mar, lo que ye un handicap pa los barcos cántabros y vascos de tanquéu (qu’utilicen cebu vivu pa garrar los bonitos) pero nun ye tanto problema pa los barcos de cacea, que son la totalidá de los asturianos.
La traducción económica d’estes primeres selmanes de costera de bonitu ye la puya na rula d’Avilés, la que más pescáu comercializa del Principáu, de 600.000 kilos de la especie a un preciu mediu de 5,75 euros. L’añu pasáu per estes feches la cifra de bonitu puesta nel mercáu yera asemeyada, pero’l preciu mediu, bultablemente inferior: 4,70 euros el kilu. Esa apreciación del bonitu puyáu n’Avilés da a entender que’l pexe ta llegando a puertu de forma constante pero ensin grandes ábanos –el desembarcu en poco tiempu de munches tonelaes fai cayer el preciu– y que’l tamañu mediu de los exemplares ye más grande, un factor que’l mercáu premia en términos de cotización.
La rula de Xixón tamién ronda’l mediu millón de kilos puyaos y nos últimos díes empezó a recibir descargues de bonitu pescáu por barcos de tanquéu (que nun faenen n’Avilés por mieu a que l’agua de la ría mate’l pexe vivo que lleven guardáu en tanques pa ser usáu como cebu). Ello ye que la rula xixonesa viose obligada a adquirir una remesa de tines por qu’escosaron les esistencies pa xestionar afechiscamente’l repique de descargues de percáu.
El contentu pol desarrollu de la costera de bonitu ye xeneralizao nos medios pesqueros consultaos por esti diariu, tanto nes principales rules asturianes como nos pequeños puertos y ente los pescadores que nestes selmanes de branu aparquen otres actividaes pa centrase nel llamáu «pexe del branu». Esi contentu entá ye mayor al esaminar el consumu de cupu de la especie: l’añu pasáu per estes feches quedaben disponibles pa la so captura en tol Cantábricu doce millones de kilos de bonitu; esti añu esa cifra ye de 19,6 millones. Esto ye, que si nada lo torga hai previsión de tar pescando bonitu a lo llargo de tol mes d’agostu y, con suerte, inclusive en septiembre. Esti escenariu ye idílicu porque garantiza ingresos regulares y constantes a la flota y dexa que fuelguen otres pesquerías que, como la merluza, agradecen una tregua.
La costera de bonitu de 2023 remató n’Asturies con un total de 2.835.141 kilos vendíos nes rules asturianes que xeneraron un valor de 10,86 millones d’euros. D’esi total, la rula de Xixón comercializó 1.588.648 kilos y la d’Avilés, 1.186.099. A fecha 30 de xunu, la rula avilesina multiplicaba por cuatro la cantidá de bonitu vendida, pero’l repique de captures na primera quincena de xunetu camudó l’escenariu y entrambes superen yá’l mediu millón de kilos vendíos. De caltenese la tónica, la segunda metá de la costera permitiría arredondiar una campaña de bonitu sobresaliente.
“Cola ayuda del Gobiernu del Principáu d´Asturies”.
