O proxecto piloto impulsado polo Concello de Carballo para fomentar o emprego de vasos reutilizables nos eventos festivos permitiu reducir un 90% os residuos de plástico e vidro durante o San Xoán.
A Lei de Residuos prohibe a utilización de vasos dun só uso. Por iso, os días 21, 22 e 23 de xuño todas as consumicións servíronse en vasos reutilizables, que, ademais, levaban rotulado o logo da campaña Carballo en festas. Agresións 0’0. Ao pedir a consumición había que depositar unha fianza de 1 euro, recuperable coa devolución do vaso.
Desde o punto de vista medioambiental, o único cuantificable, a experiencia resultou un éxito, xa que se utilizaron un total de 5.900 vasos, que permitiron reducir un 90% os residuos habituais de plástico e vidro, segundo o balance realizado polo servizo de limpeza viaria. “Isto significa que se cumpriron con creces as expectativas, polo que desde o Concello de Carballo xa estamos traballando para estender a iniciativa a outros eventos”, afirman.
Ademais, o Concello de Carballo colabora todos os anos coas comisións de festas en cuestións de “intendencia” como a colocación de vallas, o acondicionamento dos campos e a instalación de colectores de recollida selectiva dos residuos.
