Un vehículo resultou calcinado esta madrugada na urbanización Riotorto, de Carballo. Os bombeiros do parque comarcal provincial foron alertados ás 00.45 horas, e unha vez personados no lugar procederon á extinción das lapas cunha mangueira de carrete de alta presión da motobomba.
Debido a este lume foi preciso cortar, momentaneamente, o tráfico rodado na rúa Syra Alonso, ata que rematou o servizo ás 01.15 horas. Afortunadamente, non houbo que lamentar danos persoais.
Ata o lugar dos feitos tamén se desprazaron dúas patrullas da Policía Local de Carballo, a Garda Civil e membros de Protección Civil da capital de Bergantiños.