La Fiscalía presentó n’abril una denuncia por presuntos delitos contra la proteición de la fauna y contra los animales y, na mesma denuncia na que solicitó la incoación de dilixencies previes, interesó’l sobreseimientu provisional de la causa, al nun se poder determinar l’autoría. La denuncia foi interpuesta énte’l Xulgáu númberu 2 de Grau, al cometese los fechos nel Parque Nacional de Les Ubiñes-La Mesa.
El Xulgáu, acordies col ministeriu fiscal, incoó les oportunes dilixencies previes y, nel mesmu autu, alcordó l’archivu. Les dilixencies d’investigación preprocesales de la Fiscalía incoáronse depués de la denuncia recibida’l 21 de marzu de 2023 de la Coordinadora Ecoloxista.
Ente los díes 10 y 14 de marzu de 2023, la Conseyería de Mediu Rural recoyó seis exemplares muertos d’utre y de dos perros domésticos de caza nel Parque Natural de Les Ubiñes-La Mesa. En realizando les correspondientes necropsies y l’exame toxicológicu, ún de los perros dio positivu n’estricnina y una de les utres en pentobarbital. El restu de los analises dio resultáu negativu a tóxicos.
Patrulles del Seprona, en coordinación cola Unidá Canina de Cebos Envenenaos del Principáu y la Guardería del Mediu Natural, buscaron cebos envenenaos o restos de fauna muerta na zona, concretamente en Braña Riba, na redolada de La Viciella y puertu de San Lorenzo, ensin ésitu.
“Cola ayuda del Gobiernu del Principáu d´Asturies”.