Nel décimu aniversariu de la entrada en serviciu del Hospital Universitariu Central d’Asturies (HUCA), que se cumplió’l vienres de la selmana pasada, día 14, llega la hora de facer recuentu. Y el resultáu ye que seis de cada diez asturianos recibieron tratamientu nel complexu sanitariu uvieín cuandu menos nuna ocasión. «El centru lleva atendíos a 619.473 pacientes distintos dende l’entamu de l’actividá nes instalaciones de La Cadellada, onde se realizaron cerca de 207.000 intervenciones quirúrxiques», indica un comunicáu espublizáu esti día pola Conseyería de Salú del Principáu. Conózse bien que la población d’Asturies degola por poco’l millón d’habitantes. A lo llargo d’esta década, el serviciu d’urxencies asistió a 415.869 persones distintes en 1.486.114 episodios asistenciales.
Nel momentu actual, nel complexu trabayen cuasi 7.000 profesionales, de los que más d’un millar son facultativos y otros 3.000 sanitarios, fundamentalmente enfermeres.
El balance d’actividá del HUCA d’estos diez años, estrayíu del programa de xestión Millennium, ye apolmonante. Dende’l 14 de xunu de 2014, un total de 213.398 pacientes fueron hospitalizaos nos 385.093 ingresos que se rexistraron; 132.547 fueron interveníos siquier una vegada en dalguna de les 206.926 operaciones realizaes nos 33 quirófanos del hospital; y 619.473 persones producieron 10.238.638 actos clínicos nes consultes esternes.
Nel día a día de los últimos años, les cifres tamién resulten elocuentes. L’HUCA atiende cada xornada, de media, 105 ingresos, 75 intervenciones quirúrxiques, 2.100 consultes y 477 urxencies. Tocantes a prebes, caldía vienen realizase 238 tomografíes computarizaes, 88 resonancies magnétiques, 201 ecografíes, 85 mamografíes, 38 colonoscopies y 32 gastroscopies. Otru indicador llamativu d’actividá son tresplantes. Nos postreros cuatro meses realizáronse 74: 17 d’ellos de reñón, 22 de córnea, 2 de corazón, 28 de médula y 7 hepáticos. Nos sos diez primeros años, l’hospital uvieín axunta cuasi 2.400 tresplantes.
“Cola ayuda del Gobiernu del Principáu d´Asturies”.
