A Xunta rematou as obras da nova senda entre Proame e O Cancelo, na Laracha, que supuxeron un investimento autonómico de case 1,5 millóns. Os traballos están finalizados, restando só a colocación de aproximadamente 10 metros de varanda, que se acometerá esta semana, previsiblemente o xoves.
Esta actuación completa un itinerario peonil continuo de máis de 7 quilómetros ao longo da estrada autonómica AC-552 ao seu paso por este municipio. O novo itinerario ten como obxectivo reforzar a seguridade viaria e favorecer a mobilidade a pé dos veciños, conectando as vivendas da zona de Proame cos servizos e equipamentos do municipio. É unha senda de uso mixto: peonil e ciclista.
