L’historiador Lorenzo Arias sostien que la ilesia de Santiago de Gobiendes, allugada nel conceyu de Colunga, ye «la gran escaecida» del prerrománicu asturianu. Foi llevantada unos 30 años primero que Valdediós y ye «una maravía» arquitectónica, coles sos pilastres monolítiques y la so decoración escultórica. Pa iguar esi olvidu y aprovechando qu’esti añu se conmemoren los 1.100 años de la donación qu’Ordoño II fixo del templu a la Catedral d’Uviéu, el Centru de Recepción ya Interpretación del Prerrománicu Asturianu inauguró esti día una esposición dedicada al monumentu, que va permanecer abierta al públicu hasta’l 28 d’abril.
El director xeneral de Patrimoniu Cultural del Principáu, Pablo León, asistió a la so apertura xunto al alcalde de Colunga, José Ángel Toyos; la directora de la Oficina de Bienes Culturales del Arzobispáu d’Uviéu, Otilia Requejo y dellos representantes de l’Asociación d’Amigos del Conceyu de Colunga. Con ellos tuvo Lorenzo Arias, comisariu de la esposición, responsable de los sos conteníos y l’autor del llibru que lu complementa.
La maqueta de Santiago de Gobiendes. / Fernando Rodríguez
Nella Arias repasa la hestoria de la ilesia de Santiago de Gobiendes, datada na segunda metá del sieglu IX, de la so arquitectura y los sos detalles arqueolóxicos, a lo llargo de los 11 paneles y les dos maquetes del edificiu que s’enseñen nel Centru d’Interpretación de la falda del Naranco, n’Uviéu. El percorríu empieza cola donación formalizada por Ordoño II a la Catedral de San Salvador, de la ilesia y del núcleu monásticu, de la que, anque’l documentu orixinal se perdió, caltiense una trescripción del añu 1129 nel Liber Testamentorum, el Llibru de los Testamentos.
L’historiador asitia en 1853 «un puntu d’inflexón» nel percorríu del edificiu. «Hasta entós nun podemos saber cómo yera, pero entós les parroquies aumentaron, hai más fieles, y en Santiago de Gobiendes ábrese la capiya mayor, que tenía arqueríes ciegues, retírense los capiteles, que se caltienen descontextualizaos, amplíase escontra’l fondu y depués pola entrada», esplica.
El 3 de xunu del añu 1931 la ilesia foi declarada Monumentu Históricu-Artísticu y en 1988, recuerda Arias, hubo una restauración, na qu’intervieno l’arqueólogu Emilio Olávarri.
La esposición sobre Santiago de Gobiendes, con entrada gratuita, entamóse cola collaboración de l’Asociación Amigos Conceyu de Colunga, l’Arzobispáu d’Uviéu y el Conceyu de Colunga.