La estadística de cierre del añu 2023 en Cogersa dio-y a Xixón la medaya de plata de los conceyos asturianos que más residuos dixebren pa reciclar. La separación en Xixón algamó l’añu pasáu’l 30,58% de tolos residuos municipales qu’acaben nes instalaciones del Consorciu pa la Xestión de los Residuos Sólidos del Principáu d’Asturies.
Xixón namás quedó per debaxo de Tameza con un porcentaxe de reciclaxe del 41,53%. Claro que la realidá d’ún y otru conceyu ye más que distinta. Esi 30,58% correspuende con 34.898 tonelaes de basura pa reciclar sobre un total de 114.107 tonelaes de residuos xixoneses xestionaos por Cogersa –de los 443.235 del total d’Asturies– a lo llargo del añu pasáu. Ente tolos vecinos de Tameza solo xeneraron 19, 4 tonelaes de basura. Eso sí, reciclen 8.
Que Xixón tea a la cabeza de la separación de residuos nun supon que puedan tirase voladores sobre la capacidá recicladora de los xixoneses. Nin con mucho se cumple colos porcentaxes qu’afita Europa y les meyores son muncho menores de lo que fai falta pa llogralo. Al respeutive del añu 2022 esi porcentaxe namás xubió un 0,17% cuando l’incrementu mediu n’Asturies foi del 1,41. Eso sí, pasando del 22,6 al 22,9%, lo que lo dexa la media asturiana siete puntos per debaxo de la xixonesa.
Residuos municipales gestionados por Cogersa. / LNE
El fuerte de Xixón ye la recoyida de materia orgánico con un incrementu ente 2022 y 2023 del 16,8% lo que supon pasar de 3.813 a 4.457 tonelaes. Ye’l doble de la xubida conseñada como media d’Asturies, anque hai que tener en cuenta que non en tolos conceyos hai contenedores marrones.
Mientres la orgánica xube –daqué no que s’enfotó enforma’l Conceyu de Xixón al traviés d’Emulsa non solo facilitando los recursos sinón impulsando campañes de concienciación– baxen los rexistros de recoyida d’envases, papel y cartón y vidriu. Anque equí’l consuelu ye que nun ye un descensu que afecte namás a Xixón. L’añu pasáu a Cogersa llegaron dende les cais de Xixón 5.517 tonelaes d’envases, un 2,4% menos que l’añu anterior. La variación nos totales d’Asturies tamién foi en negativu con un menos delantre d’un 2,91.
Y si’l descensu n’Asturies en recoyida de papel y cartón foi del 1,78% en Xixón foi del 2,26 pasando de 8.55 tonelaes l’añu 2022 a 8.363 nel recién zarráu 2023. Y pa cerrar la triloxía de baxaes hai que cuntar col vidriu. Xixón recicló l’añu pasáu un total de 5.382 tonelaes. Un 3,76% menos que l’añu anterior. El descensu a nivel autonómicu quedó nel 4,32.
Sí qu’hai una xubida que rescample, del 10%, en vexetales y cuchos. Anque sobre una cifra menor que n’otros residuos yá que s’aplica a poco más de trés mil tonelaes. Y tamién xube, un 2,72%, la recoyida de muebles.
